Կծառայե՞ն Արդյոք Օրթոդոքս Հրեաները

Իսրայելի նախարարների կաբինետը հաստատել է մի նախագիծ, որը նախատեսում է պարտադիր զինվորական կամ այլընտրանքային ծառայություն Իսրայելի բոլոր քաղաքացիների` ներառյալ ուլտրաօրթոդոքս հրեաների` հերեդիմների համար: Նախկինում Թորան ուսումնասիրող երիտասարդ-հարեդիները ամեն տարի ստանում էին տարկետում, իսկ հիմա` 21 տարին լրանալուն պես նրանք ևս կզորակոչվեն իսրայելական բանակ:   
Բացառություն կարվի միայն հոգևոր կրթարանում ուսանող 100 երիտասարդի համար, ովքեր կրթության ոլորտում դրսևորել են բացառիկ առաջադիմություն:
Եթե հերեդիմների` ՑԱԽԱԼ զորակոչելու մասին օրինագիծը հաստատվի Կնեսետի միջգերատեսչական հանձնաժողովի կողմից, ապա ուղղափառներին ազգային բանակ կսկսեն հավաքագրել արդեն 2017թվականից: Այս նախաձեռնությանը ի պատասխան ուլտրաօրթոդոքս պատգամավորները 2013թ հուլիսի 7-ը հայտարարել են «Իսրայելի համար սև օր», նշելով, որ «վիրավորանքը, որը կառավարությունը հասցրեց կրոնական փոքրամասնությանը, համարժեք է հետապնդումների և դաժանության»:

Օրինագծի քննարկամ ժամանակ վարչապետ Բենիամին Նեթանյահուն հավաստիացրել է, որ հերեդիմների համար փոփոխությունները կմտցրվեն աստիճանաբար` «ուշադրություն դարձնելով այդ կրոնական համայնքի հատուկ պահանջմունքներին»:

Իսրայելի բնակչության 10%-ը կազմող հարեդիմներին հասարակական կյանքի մեջ ակտիվ ներառելու օրենքների փաթեթը վաղուց արդեն պառակտություն է մտցրել և΄ հասարակության, և΄ քաղաքական գործիչների միջև: 2 ամիս առաջ 30 հազար օրթոդոքս հրեաներ կազմակերպել էին բողոքի ցույցեր Երուսաղեմի զինվորական հավաքագրման կենտրոնի առջև: Նշվում է, նաև, որ տարեցտարի օրթոդոքսների թիվը երկրում ավելանում է: