ԱՄՆ-ՌԴ հարաբերությունները կարող են տուժել

    Երեկ Մոսկվայի Շերեմենտեվո միջազգային օդնավակայանում ԱՄՆ ԿՀՎ նախկին աշխատակից Էդուարդ Սնոուդենի` մարդու իրավնունքների պաշտպանությամբ զբաղվող կազմակերպությունների ներկայացուցիչների հետ ունեցած հանդիպումից հետո, վերջինս հայտարարել էր Ռուսաստանից քաղաքական ապաստան ստանալու իր ցանկության մասին` միաժամանակ ընդգծելով, որ ինքը համաձայն է ՌԴ նախագահ Վ. Պուտինի նախկինում հնչեցրած նախապայմաններին, համաձայն որոնց, Սնոուդենը պետք է դադարի վնասել ԱՄՆ շահերին: 

 


Ինչպես և սպասվում էր ԱՄՆ-ն հանդես եկավ բացասական արձագանքով` խիստ քննադատական խոսքեր հնչեցնելով ՌԴ հասցեին: Մասնավորապես ԱՄՆ-ին վրդովվեցրել էր Սնոուդենի հետ հանդիպում անցկացելու ռուսական կողմի թույլտվությունը, որը որակվեց որպես խոստացված չեզոքության խախտում, ավելին` որպես  օժանդակություն Սնոուդենին  հակաամերիկյան քարոզչություն իրականացնելու գործում: Սպիտակ տան մամուլի խոսնակի շուրթերով փաստորեն ԱՄՆ-ն հստակորեն հասկացրեց պաշտոնական Մոսկվային, որ վերջինս ուներ հնարավորություն Սնոուդենին արտահայտվելու հնարավորություն չտալու համար: 

   Այսօր արդեն ՌԴ արտգործնախարար Սերգեյ Լավրովը պատասխանեց ԱՄՆ քննադատություններին` նշելով, որ իրենք ոչ մի հաղորդակցական կապ չունեն Սնոուդենի հետ, նրա հետ չեն հանդիպում , չեն համագործակցում և դեպքերի ընթացքին էլ հետևում են լրատվության միջոցով, ինչպես բոլորը: Անդրադառնալով քաղաքական ապաստանի տրամադրման խնդրին` նախարարը նշել է, որ դրա համար գոյություն ունի սահմանված ընթացակարգ, իսկ իրենք` ի դեմս Դաշնային Միգրացիոն ծառայության, ոչ մի դիմում Սնոուդենի կողմից չեն ստացել: