ՆԱՏՕ-ն դժգոհ է Ուլյանովսկի «գներից»

Մեկ տարի առաջ ՈԴ կողմից ՆԱՏՕ-ին դեպի Աֆղանտան և հակառակ ուղղությամբ բեռների փոխադրման համար տրամադրված Ուլյանովսկի տարանցիկ կետը այդքան էլ մեծ պահանջարկ չունի: Նախօրոք պլանավորված էր, որ Ուլյանովսկով կանցնի բեռների զգալի մասը՝ 60 հազար տրանսպորտային միջոց և մոտ 100 հազար կոնտեյներ:
Մինչ օրս Դաշինքը որևէ պայմանագիր չի ստորագրել Ուլյանովսկի  բեռնափոխադրումների համար լիազորված ռուսական ընկերությունների հետ: "Коммерсант"-ի տվյալներով ՆԱՏՕ-ի գլխավոր գրասենյակում դժգոհ են ռուսական ընկերությունների ծառայությունների բարձր գներից: Անվտանգությանն աջակցելու Միջազգային ուժերի ծառայողներից մեկը պարզաբանել է, որ 1 կոնտեյների փոխադրումը Ուլյանովսկի օդանավակայանով կարժենա 50 հազար եվրո, մինչդեռ Ուզբեկստանով՝ 30 հազար:

 Ռուսական կառավարական շրջանակներն իրենց հերթին թերթին վստահեցրել են, որ ՆԱՏՕ-ն ուղղակի չի ցանկանում կախման մեջ ընկնել Մոսկվայից: «ՆԱՏՕ-ում վախենում են, որ տրանզիտային լծակի միջոցով Ռուսաստանը կազդի Դաշինքի վրա, ինչպես "Газпром"-ն է ազդում Եվրոպայի վրա»:

Զրուցակիցը վստահություն է հայտնել, որ Ուլյանովսկի տարանցիկ բազան ամեն դեպքում պահանջված կլինի: «Ուլյանովսկը պահանջված կլինի եթե ոչ ՆԱՏՕ-ի, ապա ՄԱԿ-ի կամ մեկ այլ կազմակերպության համար»:

Հիշեցնենք, որ 2011թ-ին ՆԱՏՕ-ն ՌԴ-ին էր դիմել իր տարածքը տրամադրելու խնդրանքով՝ Աֆղանստանից բեռնափոխադրումներ իրականացնելու համար, այն բանից հետո, երբ իրենց տարածքը բեռնափոխադրումների համար փակել էին Պակիստանը, Ուզբեկստանը և Ղրղզստանը (բեռնափոխադրումները հետագայում վերականգնեցին): Ծրագիրը մեկնարկել 2012թ-ի օգոստոսին, իսկ արդեն 2013թ-ի փետրվարին փորձնական տարբերակով Ուլյանովսկով տեղափոխվեցին բրիտանական կոնտինգենտի համար նախատեսված բեռներ: