Մի քանի օրվա ընթացքում Վրաստանում արդեն
3-րդ անգամ փոփոխվել է այս տարի կայանալիք նախագահական
ընտրությունների ամսաթիվը: Համաձայն
այս նոր տարբերակի, որի մասին հայտնել է նախագահի աշխատակազմի ղեկավար Անդրո
Բարնովան, քվեարկությունը կկայանա 2013թ. Հոկտեմբերի 27-ին՝ ամսվա վերջին կիրակի
օրը:
Նման որոշում կայացվել է այն բանից հետո երբ մի շարք ոչ կառավարական կազմակերպություններ քննադատել են ընտրությունների նախկին ամսաթիվը՝ հոկտեմբերի 31-ը, հայտարարելով, որ ընտրությունները պետք է անցկացվեն կիրակի օր, քանի որ դա հանդիսանում է քաղաքացիների ընտրական իրավունքի իրականացման կարևոր հանգամանք:
Համաձայն Վրաստանի Սահմանադրության նախագահական
ընտրությունները անց են կացվում գործող նախագահի լիազորությունների վերջին տարվա հոկտեմբեր
ամսին, իսկ հստակ ամսաթիվը նշանակում է հենց նախագահը: Միևնույն ժամանակ ընտրական օրենսգիրքը
սահմանում է,որ քվեարկության օրը պետք է լինի ոչ աշխատանքային օր, միևնույն ժամանակ
չնշելով հստակ օր: Այս հանգամանքը որոշ փորձագետներ համարում են օրենսդրական բաց:
Հիշեցնենք, որ այս տարի ավարտվում է
նախագահ Սահակաշվիլիի պաշտոնավարման 2-րդ և վերջին ժամանակաշրջանը: Կայանալիք
ընտրություններում նա այլևս չի կարող դնել իր թեկնածությունը: Պրոնախագահական «Միացյալ
Ազգային շարժում» կուսակցության թեկնածուն դեռևս հայտնի չէ: Իր հերթին ներկայումս Վրաստանում
իշխող «Վրացական երազանք» կոալիցիան արդեն առաջադրել է փոխվարչապետ Գեորգի
Մարգվելաշվիլիի թեկնածությունը: Կոալիցիան նախօրոք վստահություն է հայտնել իրենց
թեկնածուի մեծ առավելությամբ հաղթանակ տանելու վերաբերյալ:
No comments:
Post a Comment